Śrī Hanumān Cālīsā · Appendices
Appendix A: The Complete Hanumān Cālīsā for Daily Recitation
Open in the interactive reader
॥ दोहा ॥ (Opening Dohās)
श्रीगुरु चरन सरोज रज, निज मनु मुकुरु सुधारि। बरनउँ रघुबर बिमल जसु, जो दायकु फल चारि॥
śrīguru carana saroja raja, nija manu mukuru sudhāri | baranauṁ raghubara bimala jasu, jo dāyaku phala cāri ||
बुद्धिहीन तनु जानिके, सुमिरौं पवन-कुमार। बल बुधि बिद्या देहु मोहिं, हरहु कलेस बिकार॥
buddhihīna tanu jānike, sumirauṁ pavana-kumāra | bala budhi bidyā dehu mohiṃ, harahu kalesa bikāra ||
॥ चौपाई ॥ (Caupāīs)
जय हनुमान ज्ञान गुन सागर। जय कपीस तिहुँ लोक उजागर॥ १॥
jaya hanumāna jñāna guna sāgara | jaya kapīsa tihuṁ loka ujāgara || 1 ||
राम दूत अतुलित बल धामा। अंजनि-पुत्र पवनसुत नामा॥ २॥
rāma dūta atulita bala dhāmā | aṃjani-putra pavanasuta nāmā || 2 ||
महाबीर बिक्रम बजरंगी। कुमति निवार सुमति के संगी॥ ३॥
mahābīra bikrama bajaraṃgī | kumati nivāra sumati ke saṃgī || 3 ||
कंचन बरन बिराज सुबेसा। कानन कुंडल कुंचित केसा॥ ४॥
kaṃcana barana birāja subesā | kānana kuṃḍala kuṃcita kesā || 4 ||
हाथ बज्र औ ध्वजा बिराजै। काँधे मूँज जनेऊ साजै॥ ५॥
hātha bajra au dhvajā birājai | kāṁdhe mūṁja janeū sājai || 5 ||
संकर सुवन केसरीनंदन। तेज प्रताप महा जग बंदन॥ ६॥
saṃkara suvana kesarīnaṃdana | teja pratāpa mahā jaga baṃdana || 6 ||
बिद्यावान गुनी अति चातुर। राम काज करिबे को आतुर॥ ७॥
bidyāvāna gunī ati cātura | rāma kāja karibe ko ātura || 7 ||
प्रभु चरित्र सुनिबे को रसिया। राम लखन सीता मन बसिया॥ ८॥
prabhu caritra sunibe ko rasiyā | rāma lakhana sītā mana basiyā || 8 ||
सूक्ष्म रूप धरि सियहिं दिखावा। बिकट रूप धरि लंक जरावा॥ ९॥
sūkṣma rūpa dhari siyahiṃ dikhāvā | bikaṭa rūpa dhari laṃka jarāvā || 9 ||
भीम रूप धरि असुर संहारे। रामचंद्र के काज संवारे॥ १०॥
bhīma rūpa dhari asura saṃhāre | rāmacaṃdra ke kāja saṃvāre || 10 ||
लाय सजीवन लखन जियाये। श्रीरघुबीर हरषि उर लाये॥ ११॥
lāya sajīvana lakhana jiyāye | śrīraghubīra haraṣi ura lāye || 11 ||
रघुपति कीन्ही बहुत बड़ाई। तुम मम प्रिय भरतहि सम भाई॥ १२॥
raghupati kīnhī bahuta baṛāī | tuma mama priya bharatahi sama bhāī || 12 ||
सहस बदन तुम्हरो जस गावैं। अस कहि श्रीपति कंठ लगावैं॥ १३॥
sahasa badana tumharo jasa gāvaiṃ | asa kahi śrīpati kaṃṭha lagāvaiṃ || 13 ||
सनकादिक ब्रह्मादि मुनीसा। नारद सारद सहित अहीसा॥ १४॥
sanakādika brahmādi munīsā | nārada sārada sahita ahīsā || 14 ||
जम कुबेर दिगपाल जहां ते। कबि कोबिद कहि सके कहां ते॥ १५॥
jama kubera digapāla jahāṃ te | kabi kobida kahi sake kahāṃ te || 15 ||
तुम उपकार सुग्रीवहिं कीन्हा। राम मिलाय राज पद दीन्हा॥ १६॥
tuma upakāra sugrīvahiṃ kīnhā | rāma milāya rāja pada dīnhā || 16 ||
तुम्हरो मन्त्र बिभीषन माना। लंकेस्वर भये सब जग जाना॥ १७॥
tumharo mantra bibhīṣana mānā | laṃkesvara bhaye saba jaga jānā || 17 ||
जुग सहस्र जोजन पर भानू। लील्यो ताहि मधुर फल जानू॥ १८॥
juga sahasra jojana para bhānū | līlyo tāhi madhura phala jānū || 18 ||
प्रभु मुद्रिका मेलि मुख माहीं। जलधि लांघि गये अचरज नांहीं॥ १९॥
prabhu mudrikā meli mukha māhīṃ | jaladhi lāṃghi gaye acaraja nāṃhīṃ || 19 ||
दुर्गम काज जगत के जेते। सुगम अनुग्रह तुम्हरे तेते॥ २०॥
durgama kāja jagata ke jete | sugama anugraha tumhare tete || 20 ||
राम दुआरे तुम रखवारे। होत न आज्ञा बिनु पैसारे॥ २१॥
rāma duāre tuma rakhavāre | hota na ājñā binu paisāre || 21 ||
सब सुख लहै तुम्हारी सरना। तुम रच्छक काहू को डरना॥ २२॥
saba sukha lahai tumhārī saranā | tuma racchaka kāhū ko ḍaranā || 22 ||
आपन तेज सम्हारो आपै। तीनों लोक हांक तें कांपै॥ २३॥
āpana teja samhāro āpai | tīnoṃ loka hāṃka teṃ kāṃpai || 23 ||
भूत पिसाच निकट नहिं आवै। महाबीर जब नाम सुनावै॥ २४॥
bhūta pisāca nikaṭa nahiṃ āvai | mahābīra jaba nāma sunāvai || 24 ||
नासै रोग हरै सब पीरा। जपत निरंतर हनुमत बीरा॥ २५॥
nāsai roga harai saba pīrā | japata niraṃtara hanumata bīrā || 25 ||
संकट तें हनुमान छुड़ावै। मन क्रम बचन ध्यान जो लावै॥ २६॥
saṃkaṭa teṃ hanumāna chuṛāvai | mana krama bacana dhyāna jo lāvai || 26 ||
सब पर राम तपस्वी राजा। तिन के काज सकल तुम साजा॥ २७॥
saba para rāma tapasvī rājā | tina ke kāja sakala tuma sājā || 27 ||
और मनोरथ जो कोई लावै। सोई अमित जीवन फल पावै॥ २८॥
aura manoratha jo koī lāvai | soī amita jīvana phala pāvai || 28 ||
चारों जुग परताप तुम्हारा। है परसिद्ध जगत उजियारा॥ २९॥
cāroṃ juga paratāpa tumhārā | hai parasiddha jagata ujiyārā || 29 ||
साधु संत के तुम रखवारे। असुर निकंदन राम दुलारे॥ ३०॥
sādhu saṃta ke tuma rakhavāre | asura nikaṃdana rāma dulāre || 30 ||
अष्ट सिद्धि नौ निधि के दाता। अस बर दीन जानकी माता॥ ३१॥
aṣṭa siddhi nau nidhi ke dātā | asa bara dīna jānakī mātā || 31 ||
राम रसायन तुम्हरे पासा। सदा रहो रघुपति के दासा॥ ३२॥
rāma rasāyana tumhare pāsā | sadā raho raghupati ke dāsā || 32 ||
तुम्हरे भजन राम को पावै। जनम जनम के दुख बिसरावै॥ ३३॥
tumhare bhajana rāma ko pāvai | janama janama ke dukha bisarāvai || 33 ||
अंत काल रघुबर पुर जाई। जहां जन्म हरि-भक्त कहाई॥ ३४॥
aṃta kāla raghubara pura jāī | jahāṃ janma hari-bhakta kahāī || 34 ||
और देवता चित्त न धरई। हनुमत सेई सर्ब सुख करई॥ ३५॥
aura devatā citta na dharaī | hanumata seī sarba sukha karaī || 35 ||
संकट कटै मिटै सब पीरा। जो सुमिरै हनुमत बलबीरा॥ ३६॥
saṃkaṭa kaṭai miṭai saba pīrā | jo sumirai hanumata balabīrā || 36 ||
जै जै जै हनुमान गोसाईं। कृपा करहु गुरु देव की नाईं॥ ३७॥
jai jai jai hanumāna gosāīṃ | kṛpā karahu guru deva kī nāīṃ || 37 ||
जो सत बार पाठ कर कोई। छूटहि बंदि महा सुख होई॥ ३८॥
jo sata bāra pāṭha kara koī | chūṭahi baṃdi mahā sukha hoī || 38 ||
जो यह पढ़ै हनुमान चालीसा। होय सिद्धि साखी गौरीसा॥ ३९॥
jo yaha paṛhai hanumāna cālīsā | hoya siddhi sākhī gaurīsā || 39 ||
तुलसीदास सदा हरि चेरा। कीजै नाथ हृदय महं डेरा॥ ४०॥
tulasīdāsa sadā hari cerā | kījai nātha hṛdaya mahaṃ ḍerā || 40 ||
॥ दोहा ॥ (Closing Dohā)
पवनतनय संकट हरन, मंगल मूरति रूप। राम लखन सीता सहित, हृदय बसहु सुर भूप॥
pavanatanaya saṃkaṭa harana, maṃgala mūrati rūpa | rāma lakhana sītā sahita, hṛdaya basahu sura bhūpa ||